बेळगावात लॉक डाऊनची अंमलबजावणी करण्यासाठी पोलिसांनी पुढाकार घेतला असून अत्यावश्यक सेवेची दुकाने वगळता अन्य दुकाने पोलिसांनी शहरात फिरून बंद करायला लावली आहेत.
बेळगाव रविवार पेठेत देखील नागरिकांनी खरेदीसाठी मोठी गर्दी केली होती.किराणा दुकानात ग्राहकांची गर्दी अधिक असल्यामुळे मालक आणि नोकर वर्गाची तारांबळ उडाली होती.
एका होलसेल आणि रिटेल किराणा दुकानात तर ग्राहकांनी खूप गर्दी केल्यामुळे दुकानदाराने शेवटी दुकान बंद केले.शहरातील शहापूर,वडगाव,अनगोळ आणि विस्तारित भागात किराणा दुकान,धान्य दुकान आणि दूध विक्री केंद्रे येथे लोकांनी खरेदीसाठी गर्दी केली होती.
एपीएमसी मधील भाजी मार्केट सोमवार आणि मंगळवार बंद असल्यामुळे भाजी खरेदीसाठी देखील लोकांनी बाजारपेठेत गर्दी केली होती.हॉटेल उघडी असली तरी तेथे बसून खाण्यास मनाई असून पार्सल नेण्याची सुविधा आहे.
