देशव्यापी लॉक डाऊनच्या कालावधीत रामायण व महाभारत मालिकेप्रमाणे “राजा शिवछत्रपती” ही मालिका देखील पुन:प्रसारित केली जावी, अशी मागणी महाराष्ट्र एकीकरण युवा समितीने ट्वीटद्वारे केली आहे.
प्राणघातक विषाणू कोरोनामुळे देशभरात लॉक डाऊन घोषित करण्याबरोबरच जनतेला घराबाहेर पडू नये, असे आवाहन करण्यात आले आहे. त्यामुळे घरात बसून जनतेचं मनोरंजन व्हावं म्हणून दूरदर्शन टेलिव्हिजनच्या इतिहासातील लोकप्रिय मालिका रामायण सुरू झालं आहे. त्या नंतर आता महाभारत देखील सुरू होणार आहे. बेळगावसह सीमाभागातील जनतेसाठी देखील लॉक डाऊन काळात राजा शिव छ्त्रपती ही मालिका पुन्हा एकदा दाखवावी, अशी मागणी महाराष्ट्र एकीकरण युवा समितीने केली आहे.
युवा समितीने स्टार प्रवाह या चॅनेलकडे ट्विट करून सदर मागणी केली आहे. लॉक डाऊन काळात घरबसल्या जनतेला मनोरंजन हवं आहे. राजा शिव छत्रपती मालिका पुन्हा दाखवल्यास जनतेला छ्त्रपती शिवाजी महाराज पुन्हा समजतील युवकांना नवी प्रेरणा मिळेल, यासाठी ही मागणी युवा समितीने केली आहे.
