सर्व प्रकारच्या शिक्षण शाखांच्या अभ्यासाची पुस्तके एकाच ठिकाणी उपलब्ध असणारे सपना बुक मॉल गुरुवार दि. 12 डिसेंबरपासून बेळगावकरांच्या सेवेत रुजू होत आहे. गुरुवारी सकाळी 11 वाजता मान्यवरांच्या उपस्थितीत या मॉलचे उद्घाटन होणार असल्याची माहिती सपना बुक मॉलचे बेंगलोरचे व्यवस्थापक दोडडगौडर यांनी दिली.
कोल्हापूर सर्कल येथे मंगळवारी आयोजित पत्रकार परिषदेत ते बोलत होते. दोडडगौडर यांनी दिलेल्या माहितीनुसार सध्या सपनाचे राज्यात 18 माॅल असून बेळगावकरांच्या आग्रहास्तव हा 19 वा मॉल सुरू होत आहे. 1967 साली पुस्तकाच्या एका लहानशा दुकानापासून सुरेश व भानुशाली शहा यांनी प्रगती करत करत सपना बुक हाऊसचा विस्तार केला.
या ठिकाणी शैक्षणिक पुस्तके प्राधान्याने स्पर्धात्मक परीक्षांची पुस्तके उपलब्ध असतील, याशिवाय कन्नड आणि बेळगावच्या मराठी वाचकांना लक्षात घेऊन मराठी व हिंदी साहित्याची पुस्तकेही उपलब्ध असतील. येथे मुलांची खेळणी मिळण्याचे एक स्वतंत्र दालन असून भेटवस्तूंचा वेगळा विभाग आहे. कोणालाही मॉलमध्ये आल्यानंतर संपूर्ण माहिती व्यवस्थित मिळावी व त्यांची खरेदी सुलभ व्हावी अशा दृष्टीने माॅलची रचना करण्यात आली आहे. यावेळी बेळगाव व धारवाड मॉलचे व्यवस्थापक रघु यांनी देखील सपना बुक मॉलमधील विविध वैशिष्ट्यांबद्दल अधिक माहिती देताना वाचन चळवळ वृद्धिंगत करण्यासाठी दरवर्षी सपनातर्फे पुस्तक प्रकाशन, वाचन, गोष्टी सांगणे, प्रश्नमंजुषा व चित्रकला स्पर्धा आयोजित केल्या जातात असे सांगितले.
आता कोल्हापूर सर्कल येथे गुरुवार दि. 12 डिसेंबर रोजी सकाळी 11वाजता बुक मॉल सपनाचे उद्घाटन होणार आहे. याप्रसंगी उद्घाटक म्हणून विधान परिषदेचे सदस्य महांतेश कवटगीमठ उपस्थित राहणार आहेत. त्याचप्रमाणे जगद्गुरु श्री तोंटद सिद्धाराम महास्वामीजी तोंटद मठ डंबळ – गदग, आमदार अनिल बेनके, जिल्हाधिकारी एसबी बोमनहळळी, व्हीटीयुचे उपकुलगुरू करीसिद्धाप्पा, राणी चन्नम्मा विद्यापीठाचे उपकुलगुरू एम. रामचंद्रगौडा, माजी महापौर सिद्धनगोडा पाटील, केंद्रीय साहित्य अकादमीचे डॉ. सर्जू काटकर, मंगला मेटगूड आदी मान्यवर यावेळी हजर राहणार आहेत.
सपना बुक हाऊसच्या कर्नाटकात 18 शाखा आहेत. त्यापैकी 10 बेंगलोर मध्ये तसेच मैसूर, मंगळूर, हुबळी, धारवाड, कलबुर्गी, इरोडे येथे प्रत्येकी एक आणि कोईमतूर येथे दोन शाखा आहेत. पत्रकार परिषदेप्रसंगी चिकोडीचे पत्रकार प्रकाश देशपांडे, कन्नड साहित्य भवनचे कट्टी व सपनाचे विक्री विभागाचे श्रीनिवास उपस्थित होते.
