बेळगाव तालुक्यातील प्राथमिक आरोग्य केंद्रात सध्या डॉक्टरांची कमतरता भासत आहे. यामुळे अनेक केंद्रावर सोयी सुविधा असल्या तरी डॉक्टरांचा अभाव दिसून येत आहे. त्यामुळे तातडीने ग्रामीण भागात डॉक्टरांची नेमणूक करावी आणि रुग्णांना योग्य सुविधा पुरवाव्यात अशी मागणी होत आहे.
नुकतीच राज्य सरकारने ग्रामीण भागातील आरोग्यसेवा सुसज्ज आणि सुरळीत व्हावी यासाठी कोट्यवधी निधीची तरतूद केली आहे. आणि खर्च करण्यात आला तरी योग्य डॉक्टर नसल्यामुळे हा निधी वाया गेल्याचे दिसून येत आहे. काही ठिकाणी आधुनिक यंत्र बसविण्यात आली आहेत. मात्र ती चालविण्यासाठी संबंधित डॉक्टर नसल्यामुळे रुग्णांची हेळसांड होत आहे.
एका प्राथमिक आरोग्य केंद्रात पाच ते दहा गावांचा समावेश करण्यात येतो. यामुळे लांब वरून येणाऱ्या रुग्णांना डॉक्टर नसल्याने अनेक समस्या उद्भवत आहेत. प्राथमिक आरोग्य केंद्रात प्रसूती विभागही निर्माण करण्यात आला आहेत. मात्र त्या ठिकाणी तज्ञ डॉक्टर नसल्यामुळे ग्रामीण भागातील महिलांना पुन्हा सिविल हॉस्पिटलकडे हलविण्यात येऊ लागले आहे. त्यामुळे सरकारने पहिला डॉक्टरांची नियुक्ती करावी त्यानंतरच इमारती उभाराव्यात अशी मागणी होत आहे.
पावसाळ्यात व उन्हात साथीचे रोग आल्यास तालुक्याच्या आरोग्य यंत्रणेवर ताण पडत असतो. त्यामुळे त्यांना तातडीने सिविल हॉस्पिटल कडे 108 रुग्णवाहिकेतून हलविणे गरजेचे ठरते. या साऱ्या समस्या पाहता सरकारने हा ताण कमी करण्यासाठी योग्य डॉक्टरांची नियुक्ती करून अत्याधुनिक यंत्रसामुग्री बसविणे हे तितकेच महत्त्वाचे आहे. सध्या ग्रामीण भागातील प्राथमिक आरोग्य केंद्रात डॉक्टर नसल्यामुळे रुग्णांच्या आरोग्याचा प्रश्न गंभीर बनत चालला आहे. याबाबत केंद्र सरकारने विचार करण्याची गरज निर्माण झाली आहे.
