मराठीतून कागदपत्रे मिळावीत या मागणीसाठी पुन्हा एकदा वरिष्ठ अधिकाऱ्यांची भेट घेण्याचा निर्णय महाराष्ट्र एकीकरण समितीच्या बैठकीत घेण्यात आला.मराठा मंदिर येथे मध्यवर्ती महाराष्ट्र एकीकरण समितीची बैठक झाली.
काही दिवसांपूर्वी समितीच्या शिष्टमंडळाने जिल्हाधिकाऱ्यांची भेट घेऊन केंद्रीय भाषिक अल्पसंख्यांक आयोग आणि न्यायालयाच्या आदेशानुसार सीमाभागातील जनतेला मराठीतून कागदपत्रे आणि परिपत्रके देण्याची मागणी केली होती.त्यावेळी जिल्हाधिकाऱ्यांनी आपल्याला कागदपत्रे मराठीतून देण्यासाठी सरकारी आदेश नाही असे सांगितले होते.
यासाठी आता समितीने प्रादेशिक आयुक्त,जिल्हाधिकारी,जिल्हा पंचायत मुख्य कार्यकारी अधिकारी यांची भेट घेण्याचे ठरवले आहे.कोर्टाचा आदेश,केंद्रीय भाषिक अल्पसंख्याक आयोगाचा आदेश आदी कागदपत्रे घेऊन या अधिकाऱ्यांची भेट घेण्याचा निर्णय बैठकीत घेण्यात आला.
अधिकाऱ्यांशी चर्चा करून त्यांना आदेशाच्या प्रती दाखवून कन्नड बरोबर मराठीत कागदपत्रे देण्याची मागणी करण्यात येणार आहे.
आदेश असूनही सरकारी अधिकारी मराठीत कागदपत्रे देण्यास टाळाटाळ करत आहेत.या अधिकाऱ्यांची भेट झाल्यावर ते काय कार्यवाही करतात हे बघायचे.पुन्हा जर त्यांनी टाळाटाळ केली तर २० ऑगस्टला मोर्चा काढायचा.नंतर न्यायालयीन आदेशाचा भंग झाल्याबद्दल न्यायालयाचा दरवाजा ठोठवावा लागेल असे मालोजीराव अष्टेकर यांनी सांगितले.
