बेळगाव जिल्ह्यात दुष्काळाचे सावट गडद असताना केवळ एक ते दोन दिवस पावसाने हजेरी लावून पुन्हा विश्रांती घेतली आहे. यामुळे शेतकरी आणि नागरिकात भीती व्यक्त होत आहे. काही शेतकऱ्यांनी मशागतीसाठी प्रयत्न केले असले तरी म्हणावा तसा पाऊस नसल्याने आपली कामे थांबविण्यावर भर देत असल्याचे दिसून येत आहे. त्यामुळे लवकरात लवकर पावसाची नितांत गरज आहे.
दिनांक 6 जून रोजी मृग नक्षत्राला सुरुवात झाली आहे. मात्र या नक्षत्रावर पावसाने हुलकावणी देऊन 11 व 12 रोजी काही प्रमाणात आगमन केले होते. यामुळे साऱ्यांच्याच आशा पल्लवित झाल्या होत्या. मात्र पुन्हा पावसाने हुलकावणी दिली असून शेतकऱ्यांच्या नजरा आकाशाकडे लागूल्या आहेत.
मागील काही दिवसापासून धूळपेरणी केली आहे. मात्र पाऊस नसल्याने ही धूळ पेरणी वाया जाण्याची भीती व्यक्त होत आहे. सध्या मोठ्या प्रमाणात पावसाची गरज असून जर येत्या दोन-तीन दिवसात पाऊस पडला नाही तर पेरणी झालेले भात पिक तग धरू शकणार नाही, अशी भीती आहे.
ढगाळ वातावरण कायम असले तरी पावसाचा जोर नाही दोन दिवस पडलेल्या पावसामुळे सारे शेतकरी कामात गुंतलेले होते. मात्र पुन्हा उघडीप मिळाल्याने पाऊस येणार की नाही अशी शंका व्यक्त करण्यात येत आहे. काहींनी तर देवाकडे साकडे घातले आहेत. मात्र हवामान खात्याचा अंदाज दरवर्षीप्रमाणे चुकीचा ठरला आहे. लवकरात लवकर पाऊस पडल्यास पाणीटंचाई व जनावरांचा चारा प्रश्न मार्गी लागेल आणि शेतातील कामे सुरू करण्यावर भर देण्यात येणार आहे. त्यामुळे साऱ्यांच्या नजरा आकाशाकडे लागून आहेत. रुसलेल्या पावसाला आता येरे येरे पावसा तुला देतो पैसा म्हणावे लागेल.
