चिकोडी लोकसभा मतदारसंघात भाजपने तिकीट देताना कत्ती बंधूना फाटा देऊन अण्णासाहेब जोल्ले यांचे नाव पुढे काढल्यामुळे राजकारण चांगलेच तापले आहे. काँग्रेसने प्रकाश हुक्केरी यांना उमेदवारी दिलेली असताना त्यांच्या विरोधात भाजपने अण्णासाहेब जोल्लेंचे कार्ड पुढे केले आहे .मात्र यामुळे कत्ती बंधू नाराज झाले असून ते काय करतात याच्यावर बेळगाव जिल्हा आणि पर्यायाने उत्तर कर्नाटकातील राजकारण ठरणार असल्याची चर्चा राजकीय वर्तुळात जोरात आहे.
उमेश कत्ती यांचे बंधू असलेले तसेच आमदार असलेले रमेश कत्ती यांचे नाव चिकोडी लोकसभा मतदारसंघासाठी जाहीर करण्यात यावे अशी मागणी करण्यात आली होती. भाजपने त्या पद्धतीने काम सुरू केले होते. स्वतः माजी मुख्यमंत्री आणि भाजपचे प्रमुख बी एस एडीयुरप्पा यांनी हिरवा कंदील दिला होता. मात्र ऐनवेळी निपाणीच्या आमदार शशिकलाताई जोल्ले यांचे पती उद्योजक अण्णासाहेब जोल्ले यांना तिकीट देण्यात आले. त्यामुळे आता कत्ती बंधूंची पुढची भूमिका काय याकडे संपूर्ण राज्याचे लक्ष लागले आहे.
काँग्रेसने विद्यमान खासदार प्रकाश हुक्केरी यांना तिकीट देऊन अण्णासाहेब जोल्ले विरुद्ध हुक्केरी अशी चांगलीच टक्कर या मतदारसंघात लावली आहे. भाजपमधील काही जण त्यांच्या संपर्कात आहेत तर काँग्रेसमधील नाराज गट जोल्ले यांच्या गोटात आहे. त्यामुळे नेमका कोण निवडून येणार हा प्रश्न कठीण आहे.
कत्ती बंधू भाजपला पाठिंबा देतात की काँग्रेसला त्यावर विजय आणि पराभवाचे गणित ठरणार असल्याने या मतदारसंघातील राजकारणाकडे संपूर्ण राज्याचे लक्ष लागले आहे. तसेच या राजकारणाचा फटका इतर मतदारसंघांवरही बसणार असल्याची चर्चा आहे.
