महामार्ग ओलांडणाऱ्या ट्रॅक्‍टरला भरधाव आरामदायी प्रवाशी बसची धडक बसून बसचा क्‍लिनर जागीच ठार झाला, तर दोघा बस चालकांसह तिघे प्रवाशी असे पाच जण जखमी झाले. आज (शुक्रवार) सकाळी सहाच्या सुमारास भूतरामहट्टी क्रॉसजवळ ही घटना घडली. क्‍लिनर सिद्धरामू राजन्ना (25, रा. कोडीपूर, पोस्ट अगसनपूर, ता. मळवळ्ळी, जि. मंड्या) असे मृताचे नाव आहे. जखमींमध्ये चंद्रकांत पांडे (मुंबई, सध्या बंगळूर) जेम्स्‌ डेव्हीड (आसाम, सध्या बंगळूर) एकनाथ तळके यांचा समावेश आहे.
याबाबत काकती पोलिसांकडून मिळालेली माहिती अशी की, भूतरामहट्टी क्रॉसजवळील पेट्रोल पंपावर उसाने भरलेला ट्रॅक्‍टर इंधन भरण्यासाठी गेला. इंधन भरून पुन्हा महामार्गावर आला तेव्हा बंगळूरहून पुण्याला निघालेल्या व्होल्वो बसची (पीवाय-05, ए-3709) उसाच्या ट्रॉलीला पाठीमागून जोरदार धडक बसली. ही धडक इतकी जबरदस्त होती की बसचा पुढील भाग पूर्णपणे चेपला व यामध्ये सापडून क्‍लिनर सिद्धरामू हा जागीच ठार झाला. यावेळी बस चालविणारा सनाउल्ला अब्दुलरहमान (रा. बंगळूर) बंगळूर व अतिरिक्त चालक शिवा विराप्पा (बंगळूर) हे दोघेजण किरकोळ जखमी झाले. धडकेमुळे पाठीमागे बसलेले अन्य तिघे प्रवाशीही किरकोळ जखमी झाले आहेत. तिघा प्रवाशांवर जिल्हा रूग्णालयात उपचार सुरू आहेत. दुसरा चालक शिवा विराप्पा याच्याकडून पोलिसांनी फिर्याद लिहून घेतली आहे. घटनेची माहिती मिळताच काकतीचे उपनिरीक्षक अर्जुन हंचिनमणी यांनी सहकाऱ्यांसह घटनास्थळी भेट देऊन पंचनामा केला. जखमींना सकाळीच जिल्हा रूग्णालयात दाखल केले आहे.
