कॅन्टोन्मेंट बोर्डच्या सदस्यांसह बेळगावच्या जनतेने आपल्याला चांगले सहकार्य केले. यापुढे देखील असेच सहकार्य मिळावे, अशी अपेक्षा कॅन्टोन्मेंट बोर्डचे अध्यक्ष ब्रिगेडिअर प्रवीण शिंदे यांनी व्यक्त केली. ब्रिगेडिअर प्रवीण शिंदे यांची बदली कोलकाता येथे झाली असल्याने सदस्यांच्यावतीने स्मृतिचिन्ह देऊन त्यांना निरोप देण्यात आला.
कॅन्टोन्मेंट बोर्डची सर्वसाधारण बैठक सोमवारी आयोजित करण्यात आली होती. यावेळी प्रवीण शिंदे बोलत होते. कॅन्टोन्मेंटचे काम करताना खुप आनंद वाटला. पण सर्वांनी सर्वसामान्य जनतेच्या समस्या जाणून घेऊन कार्यरत रहावे. विकासकामे राबविण्यास प्राधान्य देण्याचे आवाहन लोकनियुक्त सदस्यांना केले. यावेळी सदस्यांच्यावतीने नवनिर्वाचित उपाध्यक्ष साजिद शेख यांच्या हस्ते ब्रिगेडिअर प्रवीण शिंदे यांना स्मृतिचिन्ह देण्यात आले.
कॅन्टोन्मेंट बोर्डच्यावतीने भाडेतत्त्वावर देण्यात आलेले गाळे तसेच इमारती आणि जागांचा करार संपल्याने वाढविण्याबाबतचा निर्णय बैठकीत घेण्यात आला. मिलिटरी हॉस्पिटलजवळील ऑक्ट्राय नाक्मयाची इमारत माजी सैनिक संघटनेला भाडेतत्त्वावर देण्यात आली होती. ही मुदत संपल्याने इमारत हटविण्याचा निर्णय घेण्यात आला होता. मात्र सदर इमारत सुस्थितीत असल्याने संघटनेला भाडे कराराने देण्याबाबत चर्चा करण्यात आली. त्याचप्रमाणे कॅन्टोन्मेंटच्यावतीने विहिरीवर जलशुद्धीकरण यंत्र बसविण्यासाठी निविदा मागविण्यात आल्या आहेत. सुरक्षा रक्षक नियुक्तीसाठी निविदा मागविल्या असल्याने याबाबत चर्चा करण्यात आली. 2017-18 आर्थिक वर्षाच्या सुधारित अर्थसंकल्पाला तसेच 2018-19 च्या अर्थसंकल्पाला मंजुरी देण्यात आली. बैठकीवेळी विविध विकासकामांबाबत चर्चा करण्यात आली. ब्रेगेडिअर कलवाड यांना पदभार दिल्याची माहिती मिळाली आहे
