बेळगाव लाईव्ह : भारतीय चित्रपटसृष्टीच्या सुवर्णकाळाचा आधारस्तंभ आणि कोट्यवधी रसिकांच्या गळ्यातील ताईत असलेल्या ज्येष्ठ गायिका आशा भोसले (९२) यांचे आज मुंबईत निधन झाले. ब्रीच कँडी रुग्णालयात उपचारादरम्यान त्यांनी अखेरचा श्वास घेतला. भारतरत्न लता मंगेशकर यांच्या निधनानंतर संगीत विश्वात निर्माण झालेली पोकळी आशाताईंच्या जाण्याने अधिक गडद झाली असून, जागतिक संगीतातील एक प्रयोगशील आणि पहाडी पर्वाचा आज अंत झाला आहे.
आशा भोसले यांची कारकीर्द ही केवळ भारतीय चित्रपटसृष्टीपुरती मर्यादित नव्हती, तर तो एक जागतिक सांगीतिक चमत्कार होता. १९३३ मध्ये जन्मलेल्या आशाताईंनी वयाच्या १० व्या वर्षापासून सुरू केलेला हा प्रवास तब्बल आठ दशके अविरत सुरू होता. त्यांनी हिंदी, मराठी, बंगाली, तमिळ, तेलगू, मल्याळम आणि कन्नडसह २० हून अधिक भारतीय आणि परदेशी भाषांमध्ये आपल्या स्वरांचा जादूई वारसा निर्माण केला. ‘गिनीज बुक ऑफ वर्ल्ड रेकॉर्ड्स’नुसार जगातील सर्वाधिक गाणी ध्वनिमुद्रित करणारी गायिका म्हणून त्यांच्या नावे जागतिक विक्रम नोंदवला गेला आहे.
शास्त्रीय संगीताचा भक्कम पाया असलेल्या आशाताईंनी गझल, भजन, कव्वालीपासून ते आधुनिक ‘पॉप’ आणि ‘कॅबरे’ अशा सर्वच शैलींमध्ये स्वतःचे निर्विवाद वर्चस्व गाजवले. ओ. पी. नय्यर, खय्याम ते आर. डी. बर्मन यांच्यासारख्या दिग्गज संगीतकारांच्या रचनांना त्यांनी आपल्या आवाजाने अजरामर केले.
केवळ भारतातच नव्हे, तर ‘बॉय जॉर्ज’ सारख्या पाश्चात्य कलाकारांसोबत काम करून त्यांनी भारतीय संगीताला सातासमुद्रापार एक वेगळी ओळख मिळवून दिली. त्यांच्या याच ऐतिहासिक योगदानासाठी केंद्र सरकारने त्यांना ‘दादासाहेब फाळके’ आणि ‘पद्मविभूषण’ या सर्वोच्च नागरी सन्मानांनी गौरवलेले आहे.
गेल्या काही दिवसांपासून श्वसनाच्या त्रासामुळे त्या रुग्णालयात उपचार घेत होत्या. त्यांचे पुत्र आनंद भोसले यांनी त्यांच्या निधनाची माहिती दिली. आशा भोसले यांच्या निधनामुळे संगीत क्षेत्रातील एक अष्टपैलू आणि प्रयोगशील व्यक्तिमत्व हरपल्याची भावना व्यक्त होत आहे. त्यांच्या पार्थिवावर उद्या, सोमवारी मुंबईतील शिवाजी पार्क येथे पूर्ण सरकारी इतमामात अंत्यसंस्कार करण्यात येणार आहेत.
