बेळगाव लाईव्ह : बेळगावमधील विशेष पोक्सो न्यायालयाने एका अल्पवयीन मुलीचा लैंगिक छळ करणाऱ्या दोन आरोपींना प्रत्येकी ३ वर्षांच्या सक्तमजुरीची शिक्षा सुनावली आहे. या खटल्यात न्यायालयाने ७ साक्षीदार आणि २९ पुराव्यांच्या आधारे आरोपींना दोषी धरले असून पीडितेच्या पुनर्वसनासाठी आर्थिक मदतीचा आदेशही दिला आहे.
नंदगड पोलीस ठाण्याच्या हद्दीत राहणाऱ्या एका अल्पवयीन मुलीचा विनयभंग केल्याप्रकरणी मोशिन कासिमसाभ साहुकार आणि इरफान निसार वस्ताद यांच्यावर पोक्सो कायद्यांतर्गत गुन्हा दाखल करण्यात आला होता.
या प्रकरणाचा तपास करून तपासाधिकारी आर. एस. सपाटे यांनी बेळगावमधील अतिरिक्त जिल्हा आणि सत्र विशेष शीघ्रगती पोक्सो न्यायालय-१ मध्ये दोषारोपपत्र सादर केले होते.
या प्रकरणाची सुनावणी विशेष न्यायाधीश पुष्पलता सी. एम. यांच्यासमोर झाली. न्यायालयाने ७ साक्षीदारांची साक्ष आणि २९ महत्त्वाच्या कागदपत्रांची पडताळणी केली. या पुराव्यांच्या आधारावर आरोपी मोशिन कासिमसाभ साहुकार आणि इरफान निसार वस्ताद (वय २४, रा. भूरणकी वडर गल्ली, खानापूर) यांच्यावरील आरोप सिद्ध झाले.
न्यायालयाने दोन्ही आरोपींना प्रत्येकी ३ वर्षांचा कारावास आणि १० हजार रुपयांच्या दंडाची शिक्षा सुनावली. दंड न भरल्यास अतिरिक्त ६ महिने कारावास भोगावा लागेल, असे न्यायाधीश पुष्पलता सी. एम. यांनी निकालात स्पष्ट केले.
पीडित मुलीला जिल्हा विधी सेवा प्राधिकरणाकडून १ लाख रुपयांची नुकसानभरपाई देण्यात यावी, असा आदेशही न्यायालयाने दिला आहे. ही रक्कम कोणत्याही राष्ट्रीयीकृत बँकेत ५ वर्षांसाठी मुदत ठेव म्हणून ठेवण्याचे निर्देश न्यायालयाने दिले आहेत. या खटल्यात सरकारच्या वतीने विशेष सरकारी वकील एल. व्ही. पाटील यांनी काम पाहिले आणि प्रभावी युक्तिवाद केला .
