बेळगाव लाईव्ह : ‘सिटीस २.०’ प्रकल्पांतर्गत तीन महत्त्वाच्या पदांच्या नियुक्तीमध्ये मोठी अनियमितता झाल्याचा आरोप आमदार एम. नागराज यांनी केला आहे.
या प्रकरणावर विधानपरिषदेत सविस्तर चर्चा करण्याची मागणी त्यांनी केली असून, योग्य कारवाई न झाल्यास संपूर्ण योजनेला धोका निर्माण होऊ शकतो, असा इशारा त्यांनी दिला आहे.
सरकारच्या निर्देशानुसार प्रकल्प समन्वयक, पर्यावरण आणि सामाजिक सुरक्षा समन्वय अधिकारी आणि प्रकल्प संपर्क अधिकारी ही पदे भरली जाणार होती.
मात्र, एम. नागराज यांच्या मते, या प्रक्रियेत पारदर्शकतेचा पूर्णपणे अभाव आहे. नियमानुसार नवीन आणि पात्र उमेदवारांऐवजी जुन्याच कर्मचाऱ्यांना या पदांवर बसवण्यात आल्याचा त्यांचा दावा आहे.
माहिती अधिकारांतर्गत मिळालेल्या कागदपत्रांचा दाखला देत नागराज यांनी सांगितले की, प्रकल्प समन्वयक या अत्यंत महत्त्वाच्या पदावर एका अशा उमेदवाराची नियुक्ती करण्यात आली आहे, ज्याच्याकडे आवश्यक कामाचा अनुभवही नाही.
अशा अयोग्य नियुक्तीमुळे प्रकल्पाचे व्यवस्थापन धोक्यात आले असून, सरकारी निधीचा दुरुपयोग होण्याची भीती त्यांनी व्यक्त केली आहे.
