बेळगाव लाईव्ह : बेळगावची ‘क्रिकेट पंढरी’ म्हणून ओळखल्या जाणाऱ्या ऐतिहासिक सरदार हायस्कूल मैदानावर सध्या एका अनोख्या प्रेक्षकाची चर्चा रंगली आहे. क्रिकेट सामन्याचा आनंद घेण्यासाठी चक्क एका माकडाने प्रेक्षक गॅलरीत ठाण मांडले असून, त्याचा हा फोटो सध्या सोशल मीडियावर मोठ्या प्रमाणात व्हायरल होत आहे.
सरदार मैदान हे केवळ खेळाचे मैदान नसून बेळगावच्या क्रिकेट संस्कृतीचा कणा आहे. अनेक दशकांपासून या मैदानाने महान खेळाडूंचा उदय आणि रोमांचक सामने पाहिले आहेत. या मैदानाशी बेळगावमधील अनेक पिढ्यांच्या आठवणी जोडलेल्या आहेत. सध्या मैदानावर सामने सुरू असताना प्रेक्षक गॅलरीत शांतपणे बसून सामना पाहणाऱ्या या माकडाने सर्वांचे लक्ष वेधून घेतले आहे.
मैदानावर आपल्या खेळाने एकेकाळी मैदान गाजवणारे अनेक माजी खेळाडू आज आपल्यात नाहीत. या मैदानाच्या कणाकणात त्यांची आठवण साठवलेली आहे. त्यामुळेच सोशल मीडियावर हा फोटो पाहून नेटकरी भावूक झाले असून, “आपले आवडते मैदान आणि क्रिकेट पाहण्यासाठी तर हे माकड येथे आले नसेल ना?” अशा प्रतिक्रिया उमटत आहेत. जणू काही आपल्या दिवंगत खेळाडूंच्या आठवणींचा वारसा पाहण्यासाठीच हा वानरराजा येथे अवतरला असल्याची भावना क्रिकेटप्रेमी व्यक्त करत आहेत.
बेळगावच्या क्रीडा विश्वात सरदार मैदानाचे स्थान अढळ आहे. खेळाडूंच्या अनेक पिढ्या घडवणाऱ्या या मैदानावरील हा दुर्मिळ नजारा क्रिकेटवरील प्रेमाचे एक अनोखे प्रतीक ठरत आहे.
बेळगावच्या क्रिकेट संस्कृतीचा कणा असलेल्या या ऐतिहासिक मैदानाने अनेक नामांकित खेळाडू घडवले आहेत. त्या आठवणींना उजाळा देताना काही नेटकऱ्यांनी भावूक प्रतिक्रिया देत, “क्रिकेटचे वेड माणसांपुरते मर्यादित नाही,” असे म्हटले आहे.
खेळ, परंपरा आणि आठवणी यांचा संगम असलेल्या सरदार मैदानावरचा हा दुर्मिळ क्षण क्रिकेटवरील प्रेमाचे वेगळेच प्रतीक ठरत आहे.
