बेळगाव लाईव्ह विशेष : माध्यम कोणतेही असो शिकण्याचे ध्येय आणि मेहनत अभ्यास करण्याची वृत्ती असेल तर यश नक्कीच मिळते हे बेळगाव तालुक्यातील मच्छे सारख्या ग्रामीण भागातील मराठी शाळेत शिकलेल्या विद्यार्थिनीने दाखवून दिले आहे.
मराठी माध्यमातून शिक्षण घेतलेल्या मच्छे येथील कु. तृप्ती मल्लाप्पा देसाई हिने आंतरराष्ट्रीय स्तरावर घवघवीत यश संपादन करत बेळगावच्या शैक्षणिक परंपरेला नवा मान मिळवून दिला आहे. HEST (Higher Education Scholarship Test) या जागतिक परीक्षेत तिने कर्नाटक राज्यात प्रथम, देशात पाचवा आणि जागतिक स्तरावर २१ वा क्रमांक पटकावत आपल्या बुद्धिमत्ता आणि जिद्दीची छाप उमटवली आहे.
३५ लाख विद्यार्थ्यांमधून उज्ज्वल यश
जगभरातील सुमारे ३५ लाख विद्यार्थ्यांनी दिलेल्या या स्पर्धात्मक परीक्षेत तृप्तीने राज्यात अव्वल स्थान मिळवत देशातही पाचवा क्रमांक पटकावला. विशेष म्हणजे, मागील १५ वर्षांनंतर कर्नाटकातून या परीक्षेत उल्लेखनीय यश मिळवणारी ती पहिली मुलगी ठरली आहे. यापूर्वी भारतात झालेल्या ‘सेट’ परीक्षेतही तिने देशात पाचवा व राज्यात प्रथम क्रमांक मिळवून सातत्य सिद्ध केले आहे.
मराठी केंद्र शाळेचा अभिमान
तृप्ती ही मच्छे येथील मराठी केंद्र शाळेची माजी विद्यार्थिनी आहे. मराठी माध्यमातून शिक्षण घेत जागतिक स्तरावर यश संपादन करणे ही केवळ वैयक्तिक कामगिरी नसून संपूर्ण मराठी शैक्षणिक व्यवस्थेचा सन्मान आहे. ग्रामीण पार्श्वभूमी, मर्यादित साधनसामग्री आणि मातृभाषेतून घेतलेले शिक्षण — या सर्व अडचणींवर मात करत तिने सिद्ध केले की गुणवत्तेला भाषा किंवा परिसराची मर्यादा नसते.
टोरोंटो विद्यापीठात निवड
तिच्या या उज्ज्वल यशामुळे कॅनडातील नामांकित University of Toronto येथे उच्च शिक्षणासाठी तिची निवड झाली आहे. जागतिक क्रमवारीत अग्रस्थानी असलेले हे विद्यापीठ कॅनडातील अव्वल शिक्षणसंस्था म्हणून ओळखले जाते. जगभरातील ४० हजारांहून अधिक महाविद्यालये व विद्यापीठे HEST परीक्षेचे गुण ग्राह्य धरतात, हे तिच्या यशाचे महत्त्व अधोरेखित करते.
सकारात्मक संदेश
तृप्ती देसाईचे यश हे ग्रामीण भागातील आणि मराठी माध्यमातील विद्यार्थ्यांसाठी प्रेरणादायी ठरले आहे. 27 फेब्रुवारी रोजी मराठी भाषा दिनी बेळगावच्या कन्येचे मराठी माध्यमातून शिकून मिळवलेले हे यश इतरांसाठी प्रेरणादायी आहे. “मोठी स्वप्ने पाहा, मातृभाषेतून शिक्षण घ्या आणि सातत्याने मेहनत करा,” हा संदेश तिच्या यशातून समाजासमोर आला आहे. आजच्या स्पर्धात्मक युगात भाषा अडथळा नसून ती बळ ठरू शकते, हे तिने कृतीतून दाखवून दिले आहे.
तिच्या या कामगिरीबद्दल सर्व स्तरांतून अभिनंदनाचा वर्षाव होत असून, तिच्या पुढील शैक्षणिक वाटचालीसाठी शुभेच्छांचा वर्षाव होत आहे. मच्छे ते कॅनडा असा हा प्रवास केवळ एका विद्यार्थिनीचा नाही, तर मराठी माध्यमाच्या आत्मविश्वासाचा आणि नव्या पिढीच्या स्वप्नांचा विजय आहे.
