बेळगाव लाईव्ह:बेळगाव शहरातील आझाद नगर परिसरात भटक्या कुत्र्यांच्या हल्ल्यात दोन वर्षाच्या चिमुकल्या बालकाला गंभीर जखमी केल्याची धक्कादायक घटना घडली आहे. अहमद रमीज बिस्की (वय २ वर्षे) असे या घटनेत जखमी झालेल्या बालकाचे नाव आहे.
रविवारी दुपारी अहमद हा आपल्या घराजवळील गल्लीत खेळत असताना सात ते आठ भटक्या कुत्र्यांनी त्याच्यावर अचानक हल्ला केला. कुत्र्यांनी बालकाला अक्षरशः ओढत नेले व त्याच्यावर चावा घेत गंभीर जखमी केले. या हल्ल्यात बालकाच्या शरीरावर अनेक ठिकाणी जखमा झाल्या आहेत.
घटनेनंतर परिसरातील नागरिकांनी तत्काळ धाव घेऊन बालकाला वाचवले. गंभीर जखमी अवस्थेत अहमदला शहरातील एका खाजगी रुग्णालयात उपचारासाठी दाखल करण्यात आले आहे.
या घटनेमुळे आझाद नगर परिसरात भीतीचे वातावरण पसरले आहे.दरम्यान, गेल्या अनेक दिवसांपासून बेळगाव शहर व उपनगरांमध्ये भटक्या कुत्र्यांचा प्रश्न गंभीर बनला असून महापालिकेकडून या समस्येकडे दुर्लक्ष होत असल्याचा आरोप नागरिकांकडून केला जात आहे.
भटक्या कुत्र्यांच्या वाढत्या संख्येमुळे अनेक उपनगरात लहान मुले, विद्यार्थी व महिलांना घराबाहेर पडणेही धोकादायक बनले आहे. अनेक ठिकाणी कुत्रा चावण्याच्या घटना सातत्याने वाढत आहेत.
भटक्या कुत्र्यांच्या संख्येवर नियंत्रण ठेवण्यासाठी महापालिकेने पाऊल उचलले असले, तरी प्रत्यक्षात वाढत्या समस्येवर अद्याप ठोस तोडगा निघालेला नाही, अशी नागरिकांची भावना आहे.
या पार्श्वभूमीवर, प्रशासनाने तातडीने गंभीर दखल घेऊन भटक्या कुत्र्यांच्या समस्येवर प्रभावी उपाययोजना कराव्यात, अन्यथा अशा दुर्दैवी घटना पुन्हा घडण्याची शक्यता नाकारता येणार नाही, अशी जोरदार मागणी होत आहे.
