बेळगाव लाईव्ह : बेळगाव येथील टीव्ही सेंटर परिसरातील सेंट्रल एक्साईज क्वार्टर्स येथे चेंबर ब्लॉक झाल्याच्या निमित्ताने सफाईचे काम सुरू असताना, संबंधित ठेकेदाराने जुनाट वृक्षांची बेकायदेशीरपणे तोड केल्याचा गंभीर प्रकार उघडकीस आला आहे.
सामाजिक कार्यकर्ते सुजित मुळगुंद यांनी त्वरित वनविभागाला माहिती दिल्यानंतर, वनविभागाने तात्काळ दखल घेऊन वृक्षतोडीचे काम थांबवले आणि जेसीबी जप्त केली आहे. मात्र, केवळ कारवाई न करता, बेकायदेशीर वृक्षतोड करणाऱ्या ठेकेदार आणि जेसीबी मालकास ‘ब्लॅक लिस्ट’ करून त्यांच्यावर कठोर गुन्हे दाखल करण्याची मागणी जोर धरत आहे.
सेंट्रल एक्साईज क्वार्टर्समधील ब्लॉक झालेले चेंबर स्वच्छ करण्यासाठी ठेकेदाराने जेसीबीचा वापर केला. चेंबरची सफाई करण्यासाठी ‘सकिंग मशीन’सारख्या आधुनिक आणि पर्यावरणपूरक साधनांचा वापर करणे शक्य असतानाही, ठेकेदाराने जेसीबीचा वापर केला आणि कामात अडथळा ठरणाऱ्या जुन्या झाडांची तोड केली.
चेंबर स्वच्छ करण्यासाठी अशा पद्धतीने निष्काळजीपणे आणि विनापरवाना वृक्षतोड करणे कितपत योग्य आहे, असा संतप्त सवाल नागरिकांकडून उपस्थित केला जात आहे.
या बेकायदेशीर वृक्षतोडीची माहिती मिळताच सामाजिक कार्यकर्ते सुजित मुळगुंद यांनी त्वरित वनविभागाला माहिती देऊन परिस्थितीचे गांभीर्य लक्षात आणून दिले. वनविभागाच्या पथकाने क्षणाचाही विलंब न लावता घटनास्थळी धाव घेतली आणि वृक्षतोडीचे कामकाज तात्काळ थांबवले.
वनविभागाने जेसीबी मालक आणि संबंधित व्यक्तींविरुद्ध कारवाई केली असली तरी, या प्रकरणातील मुख्य दोषी असलेल्या ठेकेदारावर आणि जेसीबी मालकावर गुन्हा दाखल करावा, अशी मागणी होत आहे.