बेळगाव लाईव्ह : बेळगाव विमानतळ सल्लागार समितीची बैठक नुकतीच खासदार जगदीश शेट्टर यांच्या अध्यक्षतेखाली घेण्यात आली. या बैठकीत विमानतळाचा विकास, नवीन उड्डाण सेवा तसेच रस्ते सुविधांबाबत सविस्तर चर्चा करण्यात आली.
बैठकीच्या प्रारंभी सांबरा विमानतळावरून सध्या इंडिगो व स्टार एअरच्या कोणकोणत्या शहरांपर्यंत विमान सेवा उपलब्ध आहे, याबाबत माहिती घेण्यात आली. जनतेची मागणी लक्षात घेऊन पुणे, चेन्नई, जोधपूर आणि तिरुपती या शहरांपर्यंत नवीन विमान सेवा सुरू करण्याबाबत प्रस्ताव विचाराधीन असल्याचे सांगण्यात आले.
बेळगाव शहरातून विमानतळापर्यंतच्या रस्त्यावर नेहमीच वाहतुकीची प्रचंड गर्दी असल्याने प्रवाशांना वेळेवर विमानतळावर पोहोचणे अवघड होते, अशी बाब बैठकीत मांडण्यात आली. यासाठी शहर ते विमानतळ मार्गाचे चौपदरीकरण करण्याच्या प्रस्तावाला राज्य सरकारकडून 50 कोटी रुपये मंजूर झाले असून लवकरच कामाला प्रारंभ होणार असल्याचे अधिकाऱ्यांनी स्पष्ट केले.
विमानतळावर सुरू असलेल्या नवीन टर्मिनल इमारतीच्या बांधकामाचा प्रगती अहवाल सादर करण्यात आला. ठरलेल्या वेळेत काम पूर्ण करण्याचे निर्देश यावेळी देण्यात आले. तसेच बेळगाव विमानतळाचे आंतरराष्ट्रीय विमानतळात रूपांतर करण्याबाबतही प्राथमिक माहिती बैठकीत सादर करण्यात आली.
या बैठकीत विमानतळ संचालक त्यागराजन, सल्लागार समितीचे सदस्य राहुल मुचंडी, हनुमंत कागलकर, स्नेहल कोलकार, विजय भद्रा, राजू देसाई, जयसिंग राजपूत व भारत देशपांडे आदी उपस्थित होते.