बेळगाव लाईव्ह :डायरेक्टरेट जनरल ऑफ जीएसटी इंटेलिजन्स (DGGI), बेळगाव झोनल युनिटच्या अधिकाऱ्यांनी हरिहर, दावणगेरे येथे स्थित एम/एस मरियम स्क्रॅप डीलर्स या फर्मच्या ठिकाणी तपासणीदरम्यान मोठ्या प्रमाणात जीएसटी चुकवेगिरी उघडकीस आणली आहे. या तपासात सुमारे ₹112 कोटींच्या बनावट बिले अदा केल्याचे समोर आले असून, सुमारे ₹17.14 कोटींच्या इनपुट टॅक्स क्रेडिटचा (ITC) फसवणुकीने लाभ घेण्यात आल्याचे आढळले आहे.
तपासणीदरम्यान, या फर्मचे प्रमुख कार्यकारी म्हणून ओळखले गेलेले मोहम्मद सक्लैन यांना विभागाने संकलित केलेल्या पुराव्यांसमोर तोंड दिले असता त्यांनी बनावट बिलांच्या आधारे ITCचा फसव्या पद्धतीने लाभ घेतल्याची कबुली दिली. तसेच, रिव्हर्स चार्ज मेकॅनिझम (RCM) अंतर्गत ₹4.50 कोटींच्या जीएसटीची कमी भरपाई केल्याचेही त्यांनी मान्य केले. अशा प्रकारे एकूण ₹21.64 कोटींची जीएसटी चुकवेगिरी झाल्याचे उघड झाले.
प्राथमिक तपासात असे आढळले की, संबंधित करदात्याने बहुतांश मेटल स्क्रॅप अननोंदणीकृत पुरवठादारांकडून खरेदी केले होते, ज्यावर ITC मिळत नाही. तसेच नोंदणीकृत पुरवठादारांकडून करण्यात आलेल्या खरेदींपैकी बहुतेक व्यवहार काल्पनिक किंवा अस्तित्वात नसलेल्या संस्थांकडून असल्याचे आढळले.
एम/एस मरियम स्क्रॅप डीलर्स यांनी अननोंदणीकृत विक्रेत्यांकडून घेतलेल्या वास्तविक खरेदींसोबत बनावट संस्थांकडून घेतलेल्या फसव्या ITC चे लेयरिंग करून कर चुकवेगिरी केली होती. तपासात बनावट दस्तऐवजांचा वापर करून काल्पनिक जीएसटी नोंदणी मिळवून कमिशनसाठी खोट्या बिलांचा पुरवठा केल्याचेही स्पष्ट झाले.
वरील निष्कर्षांच्या आधारे, डीजीजीआय बेलगावी झोनल युनिट यांनी मोहम्मद सक्लैन यांना 17.10.2025 रोजी सीजीएसटी कायदा, 2017 च्या कलम 69 अंतर्गत अटक केली असून, त्यांना माननीय जेएमएफसी न्यायालय बेळगाव यांच्या समोर हजर करण्यात आले. न्यायालयाने त्यांना 14 दिवसांच्या न्यायालयीन कोठडीत ठेवण्याचे आदेश दिले आहेत.या प्रकरणाचा पुढील तपास सुरू आहे.
