बेळगाव लाईव्ह : रामनगर तिनईघाट येथे सापडलेल्या नंदगड ( ता. खानापूर) येथील अंगणवाडी शिक्षिका अश्विनी बाबुराव पाटील (वय 50, रा. दुर्गानगर, नंदगड, ता. खानापूर) खुन प्रकरणात टेम्पो चालक शंकर पाटील (वय 35) याला रामनगर पोलिसांनी अटक केली आहे.
मिळालेल्या माहितीनुसार, 2 ऑक्टोबर रोजी शंकर पाटील याने आपल्या टेम्पोमधून अश्विनी पाटील हिला कक्केरी येथे जत्रेला नेले होते. जत्रा आटोपल्यानंतर परतताना त्याने तिला “बीडी येथे सोडले” असा दावा पोलिसांसमोर केला होता. त्यावेळी नंदगड पोलिसांनी चौकशी करून त्याला सोडून दिले होते. मात्र, काही दिवसांनी अश्विनी पाटील यांचा मृतदेह तिनईघाट येथील पुलाखालील पाण्यात आढळून आल्याने परिसरात खळबळ उडाली होती.
या घटनेनंतर शंकर पाटील फरार झाला होता. त्याच्या शोधासाठी रामनगर पोलिसांनी विशेष पथक तयार करून मोहीम सुरू केली होती. केवळ 24 तासांच्या आत पोलिसांनी त्याला नंदगड येथे जेरबंद केले.
अश्विनी पाटील यांच्या खुनामागचे नेमके कारण अद्याप स्पष्ट झाले नसले तरी, शंकर पाटीलच या गुन्ह्याचा सूत्रधार असल्याचा पोलिसांना संशय आहे. सध्या तो रामनगर पोलिसांच्या ताब्यात असून, त्याची सखोल चौकशी सुरू आहे.
या प्रकरणाचा पूर्ण उलगडा लवकरच होईल, असा विश्वास पोलिस अधिकाऱ्यांनी व्यक्त केला आहे.
