बेळगाव लाईव्ह :गुलमोहर बाग या कलाकारांच्या संघातर्फे येत्या रविवार दि. 5 ते गुरुवार दि. 9 ऑक्टोबर 2025 या कालावधीत दररोज सकाळी 11 ते रात्री 8 वाजेपर्यंत सर्जनशीलता, रंग आणि समुदायाचे प्रदर्शन घडवणाऱ्या ‘पर्व -कलेचा उत्सव’ या कला प्रदर्शनाचे आयोजन करण्यात आले आहे.
टिळकवाडी येथील हेरवाडकर शाळेजवळील वरेरकर नाट्य संघाच्या कला महर्षी के. बी. कुलकर्णी आर्ट गॅलरी येथे हे प्रदर्शन आयोजित करण्यात आले आहे. रविवारी प्रदर्शनाच्या उद्घाटन समारंभास प्रमुख पाहुणे म्हणून मुंबईचे प्रसिद्ध जलरंग कलाकार विकास पाटणेकर, हुबळीचे प्रसिद्ध कलाकार के. व्ही. शंकर आणि शिक्षणतज्ञ व व्यवस्थापन सल्लागार राजेंद्र बेळगावकर उपस्थित राहणार आहेत.
याच दिवशी दुपारी 4 वाजता के. व्ही. शंकर यांचे थेट ऍक्रेलिक ऑन कॅनव्हास प्रात्यक्षिक होणार असून सायंकाळी 6 वाजता विकास पाटणेकर यांच्यासोबत संवादात्मक प्रश्नोत्तराचा कार्यक्रम होणार आहे.
याखेरीस प्रदर्शनाच्या कालावधीत दररोज सायंकाळी 5 वाजता गुलमोहर बागचे कलाकार थेट चित्रकला प्रात्यक्षिक सादर करणार आहेत. सदर प्रदर्शन सर्वांसाठी खुले असून कलाप्रेमींनी या प्रदर्शनाचा मोठ्या संख्येने आनंद घ्यावा, असे आवाहन गुलमोहर बागतर्फे करण्यात आले आहे.
