बेळगाव लाईव्ह : बेळगाव शहरातील प्रस्तावित उड्डाणपुलाबाबत सोशल मीडियावर एक व्हिडिओ जोरदार व्हायरल होत आहे. मात्र, हा व्हिडिओ बनावट असून जिल्हा प्रशासनाने असा कोणताही व्हिडिओ प्रसारित केलेला नाही, असे बेळगावचे जिल्हाधिकारी मोहम्मद रोशन यांनी स्पष्ट केले आहे.
बुधवारी प्रसारमाध्यमांशी बोलताना जिल्हाधिकाऱ्यांनी सांगितले, की हा व्हिडिओ पूर्णपणे खोटा आहे. तो कृत्रिम बुद्धिमत्तेचा (आर्टिफिशियल इंटेलिजन्स) वापर करून तयार करण्यात आला आहे. बेळगावातील वाहतूक कोंडीची समस्या सोडवण्यासाठी २५० कोटी रुपये खर्चाच्या ६.८ किलोमीटर लांबीच्या उड्डाणपुलाला राज्य सरकारच्या अर्थ विभागाने मंजुरी दिली आहे. निधीसुद्धा मंजूर झाला असून, लवकरच या प्रकल्पाची निविदा प्रक्रिया सुरू होईल, असेही त्यांनी स्पष्ट केले.
तंत्रज्ञानाच्या प्रगतीमुळे कृत्रिम बुद्धिमत्ता आज आपल्या आयुष्याचा एक अविभाज्य भाग बनली आहे. मात्र, या प्रगतीचे काही गंभीर धोकेही आहेत. चा वापर करून खोटे व्हिडिओ आणि बनावट बातम्या सहज तयार करता येतात.
यामुळे समाजात गैरसमज, संभ्रम आणि द्वेष निर्माण होऊ शकतो. बेळगावातील व्हायरल झालेला उड्डाणपुलाचा व्हिडिओ हे याचे उत्तम उदाहरण आहे. अशा तंत्रज्ञानाचा वापर करून कोणीही कोणत्याही व्यक्तीचा व्हिडिओ किंवा आवाज वापरून काहीही खोटे बोलू शकतो. यातून व्यक्तीची प्रतिमा, त्यांची प्रतिष्ठा आणि एकूणच समाजव्यवस्थेसाठी मोठा धोका निर्माण होतो.
बनावट व्हिडिओ आणि ऑडिओच्या माध्यमातून एआय तंत्रज्ञानाचा वापर करून कोणत्याही व्यक्तीचा चेहरा किंवा आवाज वापरून खोटे व्हिडिओ आणि ऑडिओ तयार करता येतात.
याचा उपयोग राजकीय हेतूने, खंडणीसाठी किंवा फसवणुकीसाठी होऊ शकतो. म्हणूनच, कोणत्याही व्हिडिओ किंवा बातमीवर लगेच विश्वास ठेवण्यापूर्वी त्याची सत्यता पडताळून पाहणे अत्यंत महत्त्वाचे आहे.
विशेषतः सोशल मीडियावर येणाऱ्या माहितीबाबत अधिक सावधगिरी बाळगणे आणि कोणत्याही अफवांवर विश्वास न ठेवणे हीच आजची अधिक गरज आहे.
जिल्हाधिकारी मोहम्मद रोशन यांच्या हस्ते ‘बेळगावच्या राजा’ची महाआरती
बेळगाव लाईव्ह : बेळगाव शहरातील चव्हाट गल्ली येथील सार्वजनिक गणेशोत्सव मंडळाने स्थापन केलेल्या ‘बेळगावचा राजा’ या गणपतीची महाआरती जिल्हाधिकारी मोहम्मद रोशन यांनी मोठ्या भक्तिभावाने केली.
या प्रसंगी, जिल्हाधिकाऱ्यांनी गणेशोत्सव हा केवळ एक धार्मिक उत्सव नसून, तो एकात्मता, सामाजिक सलोखा आणि बंधुभाव वृद्धिंगत करणारा एक महत्त्वाचा सोहळा असल्याचे प्रतिपादन केले. यावेळी बोलताना ते म्हणाले की, हा उत्सव सर्वांना एकत्र आणतो आणि समाजात शांतता व एकोप्याचे वातावरण निर्माण करतो. सर्व धर्मीयांनी मिळून शांतता आणि सलोख्याने हा उत्सव साजरा करावा, असे आवाहन त्यांनी केले.
यावेळी मंडळाचे अध्यक्ष सुनील जाधव यांच्यासह प्रताप मोहिते, विश्वजित हसबे, दिगंबर पवार, प्रज्वल पाटील, प्रवीण धामणेकर, उत्तम नाकाडी, श्रीनाथ पवार, विनायक पवार, सौरभ पवार, संदीप कामुले, राहुल जाधव, संजय रेडेकर, आणि उमेश मेणसे यांच्यासह इतर पदाधिकारी आणि कार्यकर्ते मोठ्या संख्येने उपस्थित होते.
