बेळगाव लाईव्ह : पत्नीचा मानसिक आणि शारीरिक छळ करून तिचे नाक कापल्याप्रकरणी आरोपी सुरेश परशुराम नाईक (वय ३८, रा. शेंडसगळ, महाराष्ट्र) याला बेळगावात शिक्षा सुनावण्यात आली आहे.
या प्रकरणी, आरोपी सुरेश हा त्याची पत्नी सुनीता (वय ३५, रा. कागवाड) हिचा रोज दारू पिऊन शारीरिक आणि मानसिक छळ करत होता. त्यामुळे सुनीता माहेरी, कागवाड येथे येऊन राहू लागली. मात्र, आरोपी सुरेश तिथेही जाऊन तिला त्रास देऊ लागला.
सुनीता माहेरीच राहत असल्याच्या रागातून आरोपीने ६ जानेवारी २०१९ रोजी तिच्या कागवाड येथील घरी जाऊन, शेंडसगळमधील त्याच्या घरी परत येण्यास सांगितले. सुनीताने नकार दिल्यावर त्याने तिच्यावर धारदार चाकूने हल्ला केला आणि झोपेत असताना तिचे नाक आणि तोंड कापले, ज्यामुळे ती गंभीर जखमी झाली.
या प्रकरणी, कागवाडचे तत्कालीन पीएसआय हनुमंत शिरहट्टी यांनी तपास करून न्यायालयात आरोपपत्र दाखल केले होते. खटल्याची सुनावणी करताना बेळगावच्या ५ व्या अतिरिक्त जिल्हा व सत्र न्यायालयाचे न्यायाधीश एच. एस. मंजुनाथ यांनी साक्षी आणि युक्तिवाद लक्षात घेऊन आरोपी सुरेश परशुराम नाईक याला दोषी ठरवले.
न्यायालयाने आरोपीला मानसिक छळ केल्याबद्दल १ वर्षाची तुरुंगवासाची शिक्षा आणि १० हजार रुपयांचा दंड ठोठावला आहे. तसेच, चाकूने हल्ला करून गंभीर दुखापत केल्याबद्दल ५ वर्षांच्या सक्तमजुरीची शिक्षा आणि ३० हजार रुपयांचा दंड ठोठावण्यात आला आहे. सरकारतर्फे सरकारी वकील आय. एम. मठपती यांनी या प्रकरणी युक्तिवाद केला.
