बेळगाव लाईव्ह :भरधाव कारने मोटरसायकलला धडक दिल्यामुळे घडलेल्या अपघातात शाहूनगर येथील एक युवकाचा मृत्यू झाल्याची घटना कॅम्प येथील शरकत पार्क परिसरात काल बुधवारी रात्री घडली.
अपघातात मृत्युमुखी पडलेल्या दुर्दैवी युवकाचे नांव सज्जाद अब्दुल खादिर सुबेदार (वय 28, रा शाहूनगर) असे आहे. बेंगलोर येथील एका कंपनीसाठी काम करणाऱ्या सज्जादचा पुढील महिन्यात विवाह होणार होता.
मात्र तत्पूर्वीच काळाने त्याच्यावर घाला घातला. कारगाडीने काल रात्री मोटरसायकलला ठोकरल्यानंतर सज्जाद व त्याच्यासोबत असलेला साजिद मण्णीकेरी (वय 24) असे दोघेजण जखमी झाले होते.
त्यांना तातडीने हॉस्पिटलमध्ये हलविण्यात आले. मात्र उपचाराचा फायदा न होता सज्जाद याचा मृत्यू झाला. याप्रकरणी कॅम्प पोलीस ठाण्यात गुन्हा नोंद झाला असून अधिक तपास सुरू आहे.