बेळगाव लाईव्ह : बेळगाव शहरातील दक्षिण काशी श्री कपिलेश्वर मंदिरा समोरील रस्त्यावर गटारीच्या ठिकाणी निर्माण झालेला धोकादायक खड्डा तात्काळ बंद करण्याची मागणी भाविक आणि पादचाऱ्यांकडून केली जात आहे.
ओव्हर ब्रिज निर्मिती वेळी श्री कपिलेश्वर मंदिरा समोरील रस्ता पेव्हर्सचा करण्यात आला. त्यावेळी तेथील गटार रस्त्याच्या मार्गात आल्यामुळे त्यावर सिमेंट काँक्रीटच्या फरशा घालून ते बंद करण्यात आले.
मात्र अलीकडे महिन्याभरापासून बहुदा गटार स्वच्छ करण्यासाठी काँक्रीट फरशीचा कांही भाग हटवण्यात आला असला तरी तो पुर्ववत बंद करण्यात आलेला नाही.
त्यामुळे त्या ठिकाणी धोकादायक खड्डा निर्माण झाला आहे. श्री कपिलेश्वर मंदिरात देवदर्शनासाठी दररोज असंख्य भाविक येत असतात,सोमवारी पालखीच्या दिवशी तर या ठिकाणी बरीच गर्दी असते. त्यामुळे रस्त्यावर निर्माण झालेल्या त्या खड्ड्याच्या ठिकाणी दुर्घटना घडण्याची शक्यता नाकारता येत नाही.
सध्या खबरदारी म्हणून त्या खड्ड्यावर बॅरिकेड ठेवण्यात आले आहे. तथापि असा तात्पुरता उपाय न करता एक तर त्या खड्ड्यावर सिमेंट काँक्रीटचे झाकण बसवावे किंवा तो कायमस्वरूपी बंद करावा, अशी मागणी भाविकांसह पादचाऱ्यांकडून केली जात आहे.
