बेळगाव लाईव्ह :बेळगाव येथील जुनी न्यायालय इमारत 113 वर्षे जुनी असली तरी, दर्शनी भाग आणि आतील भागासह तिची रचना मजबूत असल्यामुळे सदर इमारत पाडण्यात येऊ नये, अशी जोरदार मागणी वकिलांसह आयएनटीएचएच बेळगाव चॅप्टरने जिल्हाधिकाऱ्यांकडे केली आहे.
प्रशासन बेळगाव येथील जुनी न्यायालय इमारत पाडण्याचा विचार करत आहे. या संदर्भात अॅड. नीता पोतदार यांच्या नेतृत्वाखालील वकिलांच्या पथकाने उपरोक्त मागणीचे निवेदन आज शुक्रवारी सकाळी जिल्हाधिकारी (डीसी) मोहम्मद रोशन यांना सादर केले.
निवेदन सादर करून त्यांनी जिल्हाधिकारी मोहम्मद रोशन यांना जुन्या न्यायालयाच्या इमारतीचे पाडणे रद्द करण्याची विनंती केली. स्वातंत्र्यपूर्व काळात 1912 मध्ये बांधलेली ही इमारत वारसा मूल्याने भरलेली आहे. परंतु सध्या ती पाडण्यासाठी रिकामी केली जात आहे असून बॅरिकेडिंग घालून बंद करण्यात आली आहे.
सदर इमारत 113 वर्षे जुनी असली तरी, दर्शनी भाग आणि आतील भागासह तिची रचना मजबूत आहे. सदर इमारत पाडली जाऊ नये याकरिता बेळगावातील 250 वकिलांनी जिल्हाधिकाऱ्यांना पाडण्याचे काम थांबवण्याची विनंती करणाऱ्या निवेदनावर स्वाक्षरी केली आहे.
निवेदनाचा स्वीकार करून बोलताना जिल्हाधिकारी मोहम्मद रोशन यांनी येत्या काही दिवसांत आपण हाच मुद्दा उपस्थित करणाऱ्या नागरिकांच्या आणखी एका गटाला भेटणार आहोत. आपण जुन्या वारसा इमारतींचे कट्टर समर्थक असून तुमच्या मागणीचा सहानुभूतीपूर्वक विचार केला जाईल, असे आश्वासन दिले.
निवेदन सादर करणाऱ्या वकिलांच्या पथकात अॅड. राजेश्वरी सानापुजी, अॅड. सुनील सानिकोप, अॅड. अर्चना कोरागु, अॅड. जयश्री मंड्रोली, अॅड. सुनीता पाटील यांच्यासह आयएनटीएचएच बेळगाव चॅप्टरचे निमंत्रक विनोद दोड्डनावर, सह-निमंत्रक स्वाती जोग आणि प्रमोद बोरनावर यांच्यासह अन्य वकिलांचा समावेश होता.