बेळगाव लाईव्ह – सव्यसाची गुरुकुलम्, श्री क्षेत्र दक्षिण काशी कपिलेश्वर मंदिर, बेळगाव आणि श्रीशिवप्रतिष्ठान हिंदुस्थान बेळगाव यांच्या संयुक्त विद्यमाने आयोजित करण्यात आलेल्या शिवकालीन युद्धकला आणि स्वसंरक्षण प्रशिक्षण शिबिराला बेळगावकरांचा उत्स्फूर्त प्रतिसाद मिळत आहे. श्री क्षेत्र दक्षिण काशी कपिलेश्वर मंदिर परिसरात आयोजित या शिबिरात १० वर्षांपासून ते ६० वर्षांपर्यंतचे नागरिक उत्साहाने सहभागी झाले आहेत.
गेल्या तीन वर्षांपासून सातत्याने आयोजित होणारे हे शिबिर यंदाही मे महिन्याच्या कालावधीत धर्मवीर संभाजी उद्यानात भरले आहे. या शिबिरात २५० हून अधिक प्रशिक्षणार्थी सहभागी झाले असून यामध्ये लहान मुले, मुली, तरुण, तरुणी, महिला आणि ज्येष्ठ नागरिकांचा समावेश आहे. बेळगावसह हुबळी, धारवाड, गदग येथील विद्यार्थ्यांनीही या प्रशिक्षणाचा लाभ घेण्यासाठी हजेरी लावली आहे.
याबाबत बोलताना प्रशिक्षक म्हणाले, या शिबिराचा मुख्य उद्देश मुलांना आणि नागरिकांना शिवकालीन युद्धकला तसेच आत्मसंरक्षणाचे धडे देणे हा आहे. सध्याच्या परिस्थितीत स्वसंरक्षणाचे महत्त्व वाढले असून, हे प्रशिक्षण केवळ शारीरिक सुरक्षेसाठीच नव्हे तर आत्मविश्वास आणि एकाग्रता वाढवण्यासाठीही उपयुक्त ठरत आहे. शिबिरात सहभागी झालेल्या मुलांमध्ये याचे सकारात्मक परिणाम दिसून येत आहेत. या शिबिरात मर्दानी खेळ आणि त्यातील शस्त्रे, त्यांचे महत्त्व यावर भर दिला जात आहे. लाठी-काठी, तलवार, पट्टा, भाला यांसारख्या पारंपरिक शिवकालीन शस्त्रांच्या प्रशिक्षणासोबतच सूर्यनमस्कार, दंड, बैठकीचे प्रकार अशा पारंपरिक व्यायामाचेही शिक्षण दिले जात आहे. यामुळे प्रशिक्षणार्थी शारीरिक आणि मानसिकदृष्ट्या अधिक सक्षम होत आहेत.
श्री क्षेत्र दक्षिण काशी कपिलेश्वर मंदिराचे विश्वस्त अभिजित चव्हाण यांनी सांगितले की, गेल्या तीन वर्षांपासून आम्ही बालसंस्कारासोबतच प्राचीन आणि शिवकालीन युद्धकला शिबिराचे आयोजन करत आहोत. यंदा २५० हून अधिक विद्यार्थी सहभागी असून धर्मवीर संभाजी उद्यानात हे प्रशिक्षण दिले जात आहे. हुबळी, धारवाड, गदग येथील विद्यार्थीही यात सहभागी झाले आहेत. हे शिबिर येत्या मंगळवारी संपन्न होणार आहे.
शिबिरात सहभागी झालेल्या प्रशिक्षणार्थींनीही या उपक्रमाचे कौतुक केले. वैष्णवी काकतीकर म्हणाली की, आजच्या युगात या शिबिराची खूप गरज आहे. केवळ सुरक्षा नाही तर स्वसंरक्षण महत्त्वाचे आहे. या शिबिरातून लाठी-काठी, शस्त्रकला शिकायला मिळत आहे. शिवकालीन शस्त्रकला लोप पावत असताना ही परंपरा आणि कला जतन करण्याचा प्रयत्न कौतुकास्पद आहे भारती कोटबागी यांनी हे शिबिर महिलांसाठी स्वसंरक्षणासाठी उत्तम असल्याचे सांगितले. तर शर्वरी दड्डीकर हिने लाठी, भाला, तलवार यांसारख्या शस्त्रकला आणि व्यायामाचे प्रकार शिकायला मिळत असल्याचे सांगत शिबिर उपयुक्त असल्याचे म्हटले.
एकूणच, बेळगाव येथे आयोजित हे शिवकालीन युद्धकला आणि स्वसंरक्षण प्रशिक्षण शिबिर नवीन पिढीला आपल्या गौरवशाली इतिहासाची आणि पारंपरिक युद्धकलांची ओळख करून देण्यासोबतच त्यांना आत्मविश्वासाने स्वतःचे संरक्षण करण्यास सज्ज करत आहे. या शिबिराची सांगता मंगळवारी होणार आहे.