बेळगाव लाईव्ह : अनुसूचित जाती आणि अनुसूचित जमातींमध्ये अंतर्गत आरक्षणासाठी सुरू करण्यात आलेल्या सर्वेक्षण प्रक्रियेच्या पहिल्याच दिवशी बेळगावात राजकीय गोंधळ उफाळून आला. भाजपचे नगरसेवक संदीप जिरग्याळ यांनी थेट महापालिकेच्या उपायुक्तांवर उच्च आवाजात प्रश्न उपस्थित करत वातावरण तणावपूर्ण केल्याची घटना सोमवारी घडली. काँग्रेसचे आमदार आसिफ सेठ यांनी या प्रकरणात मध्यस्थी करत नगरसेवकाला थेट शिस्तीची आठवण करून दिली.
राज्य सरकारच्या समाजकल्याण विभागाच्या निर्देशानुसार अनुसूचित जाती व अनुसूचित जमातीच्या अंतर्गत आरक्षणासाठी राज्यभर सर्वेक्षण सुरू करण्यात आले असून, त्याचा प्रारंभ सोमवारी बेळगाव शहरातील सदाशिवनगर परिसरातून झाला. यावेळी महापौर मंगेश पवार, उपमहापौर वाणी जोशी, जिल्हाधिकारी मोहम्मद रोशन, महापालिका आयुक्त शुभा बी. आणि उत्तर मतदारसंघाचे आमदार आसिफ सेठ हे उपस्थित होते.
सर्वेक्षणाची सुरुवात माजी महापौर सविता कांबळे यांच्या घरापासून होणार होती. मात्र, नियोजित ठिकाणी मोबाईल अॅप डाउनलोड होण्यात तांत्रिक अडथळा आल्याने ही प्रक्रिया एका सामान्य नागरिकाच्या घरातून सुरू करण्यात आली. दरम्यान, घटनास्थळी दाखल झालेल्या भाजप नगरसेवक संदीप जिरग्याळ यांनी या बदललेल्या योजनेवर आक्षेप घेत महापालिकेचे उपायुक्त यांच्यावर थेट आवाज चढवला. “आमदारांचे ऐकून इथे राजकारण करता का?” असा प्रश्न त्यांनी अधिकाऱ्यांना विचारला.
त्यामुळे काही वेळ वातावरणात तणाव निर्माण झाला. यावेळी तत्काळ हस्तक्षेप करत आमदार आसिफ सेठ यांनी नगरसेवक जिरग्याळ यांना जाहीरपणे समज देत सांगितले की, अधिकाऱ्यांशी अशा पद्धतीने चढ्या आवाजात बोलू नये. प्रशासन आपल्या कामात व्यस्त असून, तांत्रिक अडचणी सर्वत्र येत असतात, याची जाणीव त्यांनी करून दिली.
तथापि, नगरसेवक जिरग्याळ यांनी अधिकाऱ्यांनी शिष्टाचाराचा भंग केला असल्याचा आरोप करत त्यांच्या निलंबनाचीही मागणी केली. संपूर्ण प्रकरणात अधिकाऱ्यांनी संयम राखत परिस्थिती समजावून सांगण्याचा प्रयत्न केला. या घटनेनंतर काही काळासाठी प्रशासन आणि स्थानिक प्रतिनिधींमध्ये तणावाची परिस्थिती निर्माण झाली होती. मात्र, आमदार सेठ यांच्या हस्तक्षेपामुळे परिस्थिती नियंत्रणात आली.
