बेळगाव लाईव्ह :बेळगाव येथील एमएसडीएफ फुटबॉल अकादमी संघाने बरोडा फुटबॉल अकादमी गुजराततर्फे आयोजित 14 वर्षाखालील निमंत्रित्यांच्या बीएफए चषक -2025 फुटबॉल स्पर्धेचे विजेतेपद निर्विवादपणे पटकावले आहे.
गोवा येथील कलगुंट पंचायत मैदानावर झालेल्या स्पर्धेच्या पहिल्या साखळी सामन्यात एमएसडीएफ संघाने प्रतिस्पर्धी बीयुएफसी गुजरात संघावर 21-1 अशा गोल फरकाने दणदणीत विजय संपादन केला.
दुसऱ्या सामन्यात एमएसडीएफ अकादमी संघाने प्रतिस्पर्धी बरोडा फुटबॉल अकादमी संघाला 6-0 अशा गोल फरकाने पराभूत केले. एमएसडीएफच्या हुसेन जमादार याने 3 गोल, तर चैतन्य नाईक, अबूजर तिगडी व रायन सय्यद प्रत्येक 1 गोल केला. तिसऱ्या सामन्यात सामन्यात एमएसडीएफ संघाने प्रतिस्पर्धी व्ही.पी.सुपर-30 गोवा संघावर 3-0 असा सहज विजय संपादन केला.
उपांत्य सामन्यात एमएसडीएफ संघाने प्रतिस्पर्धी युएसआय एफ. सी. गुजरात संघाला 12-5 अशा गोल फरकाने पराभूत करून अंतिम फेरी गाठली. त्यांच्या हुसेन जमादार 4, लोया 3,अबुजर तिगडी व रायन सय्यद यांनी प्रत्येकी 2 आणि चैतन्य नाईक याने 1 गोल केला.
अंतिम फेरीत एमएसडीएफ अकादमी संघाने प्रतिस्पर्धी व्ही. पी. सुपर -30 काडोलीम गोवा संघावर 7-3 अशा गोल फरकाने सहज विजय संपादन केला. त्यांच्या हुसेन जमादार, कोरा, लोया यांनी प्रत्येकी 2 गोल, तर चैतन्य नाईक याने 1 गोल नोंदविला. विजेत्या एमएसडीएफ अकादमी संघाला फुटबॉल प्रशिक्षक मानस नायक यांचे मार्गदर्शन लाभत आहे.
