बेळगाव लाईव्ह : बेळगाव जिल्हाधिकारी कार्यालयात आज महत्त्वपूर्ण बैठक आयोजित करण्यात आली. या बैठकीत जिल्हाधिकाऱ्यांनी विविध विकास प्रकल्पांचा आढावा घेतला आणि संबंधित अधिकारी, मंत्री व प्राधिकृत व्यक्तींशी चर्चा करण्यात आली. या बैठकीत हक्कपत्र वितरण, पाणी टंचाई, रेल्वे सेवा, आणि जिल्ह्यातील विविध पायाभूत सुविधा यासंबंधी महत्त्वाचे निर्णय घेण्यात आले.
याशिवाय, कृषी आणि जलसंपदा क्षेत्रातील सुधारणा तसेच आगामी योजनांची कार्यवाही देखील चर्चिली गेली. बेळगाववासीयांसाठी लवकरच सुरु होणारी धारवाड–कित्तूर–देसूर–बेळगाव थेट रेल्वे सेवा आणि राज्य सरकारची महत्त्वाकांक्षी हक्कपत्र वितरण योजना याविषयी बेळगावचे जिल्हाधिकारी मोहम्मद रोशन यांनी पत्रकार परिषदेत माहिती दिली.
बेळगावकरांच्या बहुप्रतीक्षित धारवाड–कित्तूर–देसूर–बेळगाव थेट रेल्वे सेवा लवकरच सुरु होणार आहे. या सेवा साठी आवश्यक असलेली १२०० एकर जमीन पाच महिन्यांत अधिग्रहित केली गेली आहे, अशी माहिती जिल्हाधिकारी मोहम्मद रोशन यांनी दिली.
हे प्रकल्प केंद्र सरकारच्या मदतीने राबवले जात असून, यामुळे लोंढा मार्गाला वळसा घालण्याची आवश्यकता नाही. १ महिन्याच्या आत रेल्वे मंडळाकडून टेंडर प्रक्रिया राबवली जाईल, असे जिल्हाधिकाऱ्यांनी सांगितले.
दुसरी महत्त्वाची योजना म्हणजे राज्य शासनाची हक्कपत्र वितरण योजना. यासाठी ३,७०० हक्कपत्रांची तयारी पूर्ण झाली आहे. पुढील महिन्यात होस्पेट येथे मुख्यमंत्री सिध्दरामय्या यांच्या हस्ते हक्कपत्रांचे वितरण होणार आहे.
बेळगाव जिल्ह्याच्या लाभार्थ्यांसह, विजयनगर जिल्ह्यातील लोकांसाठीही हक्कपत्र वितरण करण्यात येईल. याशिवाय, १,७०० प्रलंबित हक्कपत्रांची वितरण प्रक्रिया एका महिन्यात पूर्ण केली जाईल, अशी माहिती जिल्हाधिकाऱ्यांनी दिली.
या संदर्भात पाणी प्रश्नावर देखील चर्चा झाली असून, सध्या कोणत्याही भागात पाण्याची टंचाई नसल्याचे जिल्हाधिकाऱ्यांनी स्पष्ट केले. याशिवाय, नूतन जिल्हाधिकारी कार्यालयाच्या बांधकामासंदर्भात देखील चर्चा झाली. यावेळी विविध विभागांच्या अधिकाऱ्यांची उपस्थिती होती.
