बेळगाव लाईव्ह : बेळगाव शहरात अलीकडे भटक्या कुत्र्यांच्या हल्ल्यात अनेक जण जखमी झाल्याच्या घटनात वाढ झाली आहे. भटक्या कुत्र्यांची संख्या शहरात वाढली असताना कुत्र्याने हल्ला करतात उपचारासाठी ज्या जिल्हा रुग्णालयात दाखल करण्यात येते त्याच जिल्हा रुग्णात देखील भटक्या कुत्र्यांचा वावर वाढला आहे त्यामुळे भटक्या कुत्र्यांचे नियंत्रण करण्यात मनपा प्रशासनाला अपयश आले आहे हे समोर आले आहे. बेळगाव सिव्हिल हॉस्पिटलमध्ये भटक्या कुत्र्यांचा वावर वाढला असून एखादी अपायकारक घटना घडण्यापूर्वी या कुत्र्यांचा बंदोबस्त करण्याची जोरदार मागणी केली जात आहे.
सध्या शहरातील गल्लीबोळात भटक्या कुत्र्यांची संख्या वाढली आहे. चौकाचौकात भर रस्त्यावर कुत्री चावण्याच्या घटना घडत आहेत. अशा परिस्थितीत चक्क सिव्हिल हॉस्पिटलमध्ये भटक्या कुत्र्यांचा वावर वाढल्याने हा एक चर्चेचा विषय ठरला आहे.
लोकांचा वावर असताना देखील ही कुत्री बिनदिक्कत हॉस्पिटलच्या व्हरांड्यात मुक्काम ठोकून असतात. त्यामुळे हॉस्पिटलमध्ये येणाऱ्या रुग्ण व त्यांच्या नातलगांना विशेष करून महिलावर्ग व लहान मुलांना या कुत्र्यांच्या दहशतीखाली ये-जा करावी लागत असते. तेंव्हा हॉस्पिटल प्रशासनाने याची गांभीर्याने दखल घेऊन एखादी दुर्घटना घडण्याची वाट न पाहता या भटक्या कुत्र्यांचा तातडीने बंदोबस्त करावा, अशी मागणी केली जात आहे.
बेळगांव शहर परिसरात कुत्र्यांच्या हल्ले करण्याचे प्रकार वाढत आहेत. अनेक कुत्र्यांच्या चाव्याने जखमी झाल्यामुळें अनेकांना त्रास सहन करावा लागला आहे. कांही घटनांमध्ये नागरिकांच्या जीवावर बेतण्याचा प्रकारही घडला आहे. कुत्र्यांच्या चाव्यामुळे वेळीच उपचार न झाल्यास जीवावर बेतणारा रॅबिज सारखा रोग होऊ शकतो.
यासाठी सरकारकडून मनुष्याची लसीकरण मोहीम राबविण्यात येत असली तरी सद्यस्थितीत बेळगावमध्ये भटक्या कुत्र्याचे लसीकरण होणे अत्यंत गरजेचे आहे. तथापी प्रशासन उदासीन असल्याचे दिसून येत असल्यामुळे नागरिकात नाराजी व्यक्त होत आहे.बेळगाव शहरातील चव्हाट गल्लीत रविवारी एका लहान मुलाला भटक्या कुत्र्याने हल्ला करून जखमी केले होते ही घटना ताजी असताना जिल्हा रुग्णालय परिसरात भटकी कुत्री वावरताना आढळली आहेत त्यामुळे प्रशासनाचे अभ्यास पुन्हा समोर आले आहे.
