बेळगाव लाईव्ह : बेळगाव जिल्ह्यात नवीन जिल्हाधिकारी कार्यालय उभारणीला वेग आला आहे. यासाठी सरकारने ५० कोटी रुपये मंजूर केले असून, हिंडलगा परिसरात जागेची पाहणी करण्यात आली. पालकमंत्री सतीश जारकीहोळी आणि महिला व बालविकास मंत्री लक्ष्मी हेब्बाळकर यांच्या उपस्थितीत जिल्हा पातळीवरील अधिकाऱ्यांसोबत चर्चा झाली.
बेळगाव जिल्ह्यासाठी नवीन जिल्हाधिकारी कार्यालय उभारण्याच्या निर्णयानंतर, आज हिंडलगा परिसरात पालकमंत्री सतीश जारकीहोळी, मंत्री लक्ष्मी हेब्बाळकर, जिल्हाधिकारी मोहम्मद रोशन, पोलीस अधीक्षक डॉ. भीमाशंकर गुळेद यांनी प्रत्यक्ष पाहणी केली.
महिला व बालविकास मंत्री लक्ष्मी हेब्बाळकर यांनी सांगितले की, बेळगाव शहराच्या विकासासाठी ग्रामीण भागाचा विकासही आवश्यक आहे. यासाठी सुवर्णसौधजवळ, कणबर्गी आणि हिंडलगा या ती
न ठिकाणी जागा निवडण्यात आली होती.
मात्र, हिंडलगा परिसर शहराजवळ असल्याने ही जागा अधिक योग्य असल्याचे त्यांनी स्पष्ट केले. सध्याच्या जिल्हाधिकारी कार्यालयाच्या जागेवरच नवी इमारत बांधण्याचा विचार होता,
मात्र ऐतिहासिक इमारती पाडल्यास वाद निर्माण होऊ शकतो, तसेच शहरातील गर्दी लक्षात घेऊन स्वतंत्र जागेत जिल्हाधिकारी कार्यालय उभारण्याचा निर्णय घेतल्याचे त्यांनी सांगितले.