‘गुरुविन कोण दाखवील वाट’ असे म्हटले जाते यामुळे कितीही माणूस मोठा झाला तरी नेहमी गुरु हा पूजनीय आणि वंदनीय असतो. यामुळेच पन्नास वर्षांपूर्वी आपण शालेय शिक्षण घेतलेल्या त्या गुरूंना वंदनावे म्हणूनच माजी विद्यार्थ्यांकडून शिक्षकांचा सन्मान सोहळा पार पडला.
विशेष म्हणजे पन्नास वर्षांपूर्वी आपल्याला शिकवलेल्या शिक्षकांना गुरुपौर्णिमेनिमित्त गुरुवंदना देण्यात आली. गुरुपौर्णिमेनिमित्त बेळगाव मधील ठळकवाडी हायस्कूलमध्ये हा आगळावेगळा कार्यक्रम आयोजित करण्यात आला होता. ठळकवाडी हायस्कूलच्या माजी विद्यार्थ्याकडून पन्नास वर्षांपूर्वी शिकवणाऱ्या शिक्षकांचा सन्मान करण्यात आला.
बेळगाव येथील ठळकवाडी हायस्कूलच्या 1972 साली दहावी उत्तीर्ण झालेल्या विद्यार्थ्याकडून आपल्या तत्कालीन शिक्षकांचा सन्मान करून गुरुपौर्णिमा साजरी करण्यात आली. जुन्या आठवणींना उजाळा देत माजी विद्यार्थ्यांनी आपल्या गुरूंना वंदन करत हा उपक्रम राबविला.
त्या वेळी शिकविलेले शिक्षक एम आर कुलकर्णी (वय वर्षे 82) आणि मल्लपगोळ सर (वय वर्षे 84 )या दोघांचा शाल ,गुलाबपुष्प आणि मिठाई देऊन गौरव करण्यात आला.
टिळकवाडी येथे वास्तव्य असलेल्या कुलकर्णी सर यांच्या घरी विद्यार्थ्यांनी बुधवारी भेट देऊन हा सन्मान केला. यावेळी शिक्षक आणि विद्यार्थ्यांनी जुन्या आठवणींना उजाळा दिला.
याप्रसंगी विद्यार्थी अनंत लाड, मोहन पवार, प्रमोद कुलकर्णी, बंडू शिंदगी, अंतोन कारवालो आणि भोमानी बिर्ज़े हे उपस्थित होते. 50 वर्षा पूर्वीच्या विद्यार्थ्यांनी हा आपुलकीचा कार्यक्रम केल्याबद्दल गुरुवर्यांनी आनंद व्यक्त केला.