ऑक्सिजनची कमतरता लक्षात घेऊन केंद्र सरकार कर्नाटकला सहा टँकर ऑक्सिजन पाठवणार असून यापैकी एक टॅंकर बेळगावसाठी राखीव ठेवण्यात आल्याची माहिती जिल्हा पालकमंत्री गोविंद कारजोळ यांनी दिली.
वैद्यकीय ऑक्सिजनची मागणी वाढल्याने केंद्राकडे प्रस्ताव पाठविला होता. केंद्राने या प्रस्तावाची दखल घेऊन 6 टँकर ऑक्सिजन पाठवण्याची तयारी केली असून या प्रत्येक टँकरमध्ये 20 टन ऑक्सीजन भरलेला असेल. त्यापैकी एक टँकर बेळगाव जिल्ह्याला मिळणार आहे.
याबाबत केंद्रीय मंत्री प्रल्हाद जोशी आणि मुख्यमंत्री बी. एस. येडियुरप्पा यांच्याकडे मी पाठपुरावा केला होता. त्याला त्यांनी प्रतिसाद दिला आहे. प्रारंभी ऑक्सीजन केवळ 18 केएल होते. सतत पाठपुरावा नंतर ते 24 केएल वर पोहोचले आहे. तथापि माजी मुख्यमंत्री जगदीश शेट्टर यांच्याकडे मी 30 केएल ऑक्सिजनची मागणी केली आहे आणि शेट्टर यांनी त्याला सकारात्मक प्रतिसाद दिला आहे अशी माहिती पालक मंत्री कारजोळ यांनी दिली.
कोरोना बाधितांसाठी उपयुक्त रेमडेसिव्हिर लस पुरवठ्यात तीन पट वाढ झाली असून आता ऑक्सिजन पुरवठा झाल्यानंतर बेड्सची संख्या वाढविण्याचा विचार आहे असे सांगून कोरोना नियंत्रणासाठी सरकार सर्व ते प्रयत्न करत आहे. मात्र याच बरोबर नियमांचे पालन करण्याद्वारे जनतेचे सहकार्य अपेक्षित आहे, असे पालकमंत्री गोविंद कारजोळ म्हणाले.
