बेळगांव जिल्हा प्रशासनासह आरोग्य खात्याच्या प्रयत्नांमुळे जिल्ह्यातील कोरोना रुग्णांची संख्या नियंत्रणाखाली येत असून सध्या जिल्ह्यात 500 पेक्षा कमी कोरोना सक्रिय रुग्ण आहेत.
शनिवारी बेळगाव जिल्ह्यात 19 नवीन रुग्णांची नोंद झाली असून 57 रुग्ण कोरोनामुक्त झाले आहेत त्यामुळे ऍक्टिव्ह रुग्ण संख्या देखील 459 इतकी पाचशे पेक्षा कमी झाली आहे
बेळगांव जिल्हा आरोग्य आणि कुटुंब कल्याण खात्याच्या सर्व्हिलन्स युनिटने काल प्रसिद्धीस दिलेल्या कोरोना वैद्यकीय पत्रकानुसार शुक्रवार दि. 6 नोव्हेंबर 2020 रोजी सायंकाळी 7 वाजेपर्यंत कोरोनासंदर्भात बेळगांव जिल्ह्यात एकूण 2,33,479 संशयित व्यक्तींचे वैद्यकीय निरीक्षण करण्यात आले.
जिल्ह्यात 14 दिवसांसाठी होम काॅरन्टाईन केलेल्या जिल्ह्यातील व्यक्तींची संख्या 27,446 झाली असून हॉस्पिटलमध्ये आयसोलेशन करण्यात आलेल्या व्यक्तींची संख्या 498 आहे. काॅरन्टाईन अर्थात विलगीकरणाचा 14 दिवसांचा कालावधी पूर्ण केलेल्या लोकांची संख्या 28 069 आहे, तर काॅरन्टाईनचा 28 दिवसांचा कालावधी पूर्ण केलेल्या व्यक्तींची संख्या 1,77,466 आहे.
कोरोना विषाणू संसर्ग निदानासाठी एकूण 2,32,388 जणांचे स्वॅब नमुने घेण्यात आले होते. त्यापैकी 24,890 नमुन्यांचा वैद्यकीय अहवाल कोरोना पॉझिटिव्ह आला असून यामध्ये काल शुक्रवारी नव्याने आढळलेल्या 32 जणांच्या अहवालांचा समावेश आहे.
प्रयोगशाळेत धाडलेल्या नमुन्यांपैकी 2,03,988 नमुने निगेटिव्ह असून कालपर्यंत ॲक्टिव्ह केसीस 498 होत्या. त्याचप्रमाणे 2,123 नमुन्यांचा अहवाल प्रलंबित होता. कालपर्यंत जिल्ह्यात 335 रुग्णांचा मृत्यू झाला असून 24,057 रुग्ण कोरोना विषाणूच्या संसर्गापासून मुक्त अर्थात पूर्णपणे बरे झाले असून त्यांना हॉस्पिटलमधून डिस्चार्ज देण्यात आला आहे. जिल्ह्यात काल शुक्रवारी आढळलेल्या 32 रुग्णांमध्ये बेळगांव तालुक्यातील 17, गोकाक तालुक्यातील 2 बैलहोंगल तालुक्यातील 4 आणि अथणी, हुक्केरी व रायबाग तालुक्यातील प्रत्येकी 3 रुग्णांचा समावेश आहे.
