सर्व प्रकारचे अडथळे दूर करत बेळगाव मध्ये अनेक महिला यशस्वी वाटचाल करीत आहेत. स्वतः निवडलेल्या क्षेत्रात त्यांनी वेगळे स्थान निर्माण केले आहे. सामाजिक, क्रीडा आणि इतर कुठलेही क्षेत्र असो, त्यांनी आम्ही पुरुषांपेक्षा कमी नाही हेच दाखवून दिले आहे. यापैकी काही कर्तृत्ववान महिलांची बेळगाव live ओळख करून देत आहे.
डॉ नेत्रा मनोज सुतार
डॉ नेत्रा या डेंटिस्ट आहेत. पेशा डॉक्टरीचा असला तरी त्यांचे सामाजिक क्षेत्रात मोठे योगदान आहे. आयू फौंडेशन च्या त्या विश्वस्थ आहेत. ग्रामीण भागात शिक्षणाचा दर्जा सुधारण्यासाठी त्या काम करीत आहेत.
शुन्य मदत मिळणाऱ्या शाळांमधील शिक्षण सुधारण्यासाठी त्या काम करीत असून मुतगा येथील सरकारी शाळा हे त्यांच्या उत्कृष्ट कामाचे उदाहरण आहे. त्यांच्या सातत्याने केलेल्या प्रयत्नांनी या शाळेचा चेहराच बदलून गेला असून तेथील दर्जात वाढ झाली आहे.
डॉ नेत्रा या रोटरी क्लब च्या कामात सुद्धा सहभागी असून पौगंडावस्थेत असणाऱ्या शाळकरी मुलांना शारीरिक बदल, त्यातून निर्माण होणाऱ्या गोष्टींची काळजी व शारीरिक स्वच्छता व आरोग्य यांचे शिक्षण देतात. ग्रामीण भागातील सरकारी शाळांमध्ये शिक्षण घेणाऱ्या मुलींना त्यांनी विशेष जागृती व शिक्षणाचे महत्व पटवून दिले आहे.
सरकारी शाळेत शिकणाऱ्या मुलींना शारीरिक आणि मानसिक बदलांवर कसे सामोरे जावे याचे शिक्षण देण्यासाठी त्यांनी शिबिरे घेतली आहेत. तसेच अनेक रुग्णांची मोफत दंत चिकित्सा करून त्यांनी उपचार केले आहेत.
