बेळगाव येथे अधिवेशन घेणारे कर्नाटक सरकार पहिल्या दोन दिवसात आंदोलनांनी हादरून गेले आहे. यापुढेही रोज आंदोलने वाढणार असून कर्नाटक सरकारला स्वस्थ बसू द्यायचे नाही असा चंग आंदोलकांनी आणि त्यांना पाठींबा देणाऱ्या विरोधी पक्षांनी बांधला आहे.
पहिल्या दिवशीच भाजप च्या नेतृत्वाखाली राज्यातील सर्व शेतकऱ्यांचे आंदोलन झाले आहे. तसेच बेळगाव जिल्हाधिकारी कार्यालयासमोर शेतकऱ्यांचे सलग आंदोलन सुरू आहे. ही आंदोलने मागे घेणार नाही अशी भूमिका घेण्यात आल्याने सरकारला काहीही करता आलेले नाही.
यातच यापुढे उत्तर कर्नाटक विकास, मनरेगा आणि बांधकाम कर्मचारी मोर्चा व उत्तर कर्नाटक विकास दुर्लक्ष या मुद्द्यांवर वेगवेगळी आंदोलने होत असल्याने सरकार हादरणार आहे.
एकही आंदोलन न होता शांतपणे अधिवेशन झाले असे कधीच झाले नाही. यामुळे समाजातील सर्व घटकांना सरकार समाधानी ठेऊ शकलेले नाही हे स्पष्ट आहे. अजूनही आपल्या मागण्यांसाठी नागरिकांना आंदोलन करावे लागते हे अपयश आहे. त्यामुळे सरकारला या गोष्टींचा सामना करावा लागत असून नागरिकांच्या मागण्या पूर्ण करण्यासाठी सरकारचा कस लागणार आहे.
